1. Pomorska anegdota

XXL

Gospa Ivanka je bila žena od barbi Vinka, ča će reć da je se reguli i užanci brzo naučila

Užanci i reguli na brodu se retko menjaju, bolje reć nikako, premda su se nekad silon prilika morale menjat. A menjale su se kako su se menjali i brodi, od drveneh jedrenjaci pa do parneh i motorneh, ali ne puno. Brod od broda razlikuje se kod čovik od čovika, pa makar bila storena cela serija isteh, va isten škveru, isto opremljenih, ma oni su opet različiti, specifični. Neki manje, neki više pegulani, neki nikad nikakovu havariju nisu doživeli, neki sako malo pa neku pegulu doživeju. A brod čine ljudi ki na njemu živeju. Brod ni radno mesto, na brodu se živeje, iskusni marinaji to dobro znaju. Pa kad se već živeje treba se i nekoga reda držat. Zna se ki je glavni, ki ča dela, kade i kada se obedva, večera, kade se spi, ki je za ča odgovoran... se je regulano do najsitnejeh detalji.

Gospa Ivanka je bila žena od barbi Vinka, ča će reć da je se reguli i užanci brzo naučila. A kako i ne bi kad je z mužen celi svit pasala na brodu. Va braku su bili više od trejset let, a kako dece nisu imeli oni bi se lipo skupa inbarkali i navigali. More joj ni škodilo, klimu je dobro podnosila, bila je prijazna, va niš se ni mešala i nikomu ni dosađivala, ma ko da je na brodu ni ni. Redovito je skupa z mužen došla va meser na marendu, obed i večeru, i nikad ni niš ekstra iskala. A najviše su ju voleli kamarijeri, aš je sama redila barbinu kabinu i saloncin, tako da su oni imeli fanj manje dela.

Po moru Ivanka je obično čitala, plela i štikala tako da joj nikad ni bilo dosadno, ma sejedno puno je više volela doć va porat, i to ča egzotičneji. Problem je bil samo to ča barba Vinko ni volel poć na kraj va portu. Vavek je našal neku škužu da ne more poć van: aš da čeka agenta, štivadora, šipšandera, survejera...

Tako je bilo i jednoga puta kad su na vijaju tikali porti ke je malo ki volel. Bili su to porti zapadne Indije, Pakistan, Perzijski zaljev... A gospa Ivanka je otela poć van iako je prvo već bila tuda. Mogla je morda poć i sama, ali arpski je to svit, sama ženska, šetat... ni zgodno. I onda je nekako namirila da joj za pratnju bude kapo makine. Kapo Ivo je bil fanj mlaji od njih, pa je bil pun regvarda, a kako su bili skoro pa susedi, imeli su o čemu povedat.

Za obedon su mlađi ofičjali povedali kako su sinoć bili vane, i da ni neke zabavi, ali da su butigi pune najmoderneje elektronike, suk blišći od zlata... ma nima čega nima.

- Šjor Ivo, ste vi bili sinoć vane? - pitala je gospa Ivanka kapa makine.

- Nisan. Imel san dela. Poć ću večeras, posle večeri. Hladneje je pa se lagje diše. -

- Vinko, a ča ne bimo i mi mogli malo poć nogi protegnut? - pitala je gospa Ivanka muža.

- Ma ne moren, večeras će delat tri ruke, a karag je delikat, volin bit tu. Ne daj bože da ča po zlu krene... - odgovoril joj je barba.

- Gospa Ivanka, pa morete poć s manun, ako barba nima niš protiv. - ponudil se gentelmanski Ivo i pogledal barbu.

- Da protiv! Samo znajte, neće van bit lahko. Kad se ona butigi dočepa, ta ne izlazi tako brzo!

I tako nakon večeri agent je poslal taksi i gospa Ivanka i Ivo su šli va grad. Šetali su, a ona je razgledivala i kupovala, vidno uzbuđena i jako zadovoljna, a kapo je mirno čekal da ona fini. Kad su se napokon odbavili da gredu put broda Ivo je rekal: - Oprostite, neč san pozabil kupit, za čas ću ja to... - i zaleti se va jedan žgabucin. Ni pasal ni minut i evo ga nazad z jednen paketićen pod rukun.

- Ma ča ste to kupili tako na brzinu ako se sme znat? - znatiželjno je pitala Ivanka.

- Ma niš spomena vredno... Znate, ja ne volin prat dolnji veš pa san kupil duzinu mudanat aš ovde su jeftine i od pravoga egipatskoga pamuka. - sramežljivo je rekal Ivo.

- Pa ča mi valje niste rekli!? Gren ih i ja momu Vinku kupit! Nego ki ste broj za vas zeli?

- XL! - odgovori Ivo pa reče – Počekajte, ja ću van ih kupit... - pa skoči nazad va butigu i kupi modante i za barbu. Zeli su taksi i za pol uri bili na brodu, saki z svojim paketićen pod miškun. Ivo je šal va svoju kabinu, odložil paket z modantamin i jušto se odbavil poć va banj oprat se, kad mu je neki počel kucat na vrata, kad ono Ivanka. Zajedno z vrat ga je pitala: - Ste provali modanti?

- San! - automatski odgovori Ivo.

- I su van dobre?

- Su.

- A momu Vinku su do vrata! Morat ćete poć jutra smanun promenit ih.

- Teško, aš barba je rekal da je partenca jutra jutro.

- A ča ću ja onda neboga!?

- Morda će bit najboje da ih onda samo malo prekrojite pa će mu to bit i modante i kanoćera!