Tito – Bourguiba sava sava
BN 195Ta put na povratnen putovanju imeli su karag naranač i lemuncini z Haife i Famagusti za Riku, stotinjak ton lešnjaki iz Turske va vrećah za Ravenu, i neč cizibi za Veneciju
Bil je to mali brod, devedeset metri dug, jedanajst širok, nosivosti tisuću dvisto ton, z tri štivi, dve spred punta i jednu odzada, po krme. Već onda je bil star, storen davnega 1938. leta negde va nordu, ali još vavek je to bil dobar brod, odličan za more, a i dobru je makinu imel. Uglavnom su se držali po Mediteranu, a kako je bil na liniji za Izrael, tako nijednemu arapskemu portu ni smel ni blizu doć, aš je bil na crnoj je liste brodi ki trguju z Izraelon! Znalo se je, ako se neki od brodi z crne liste pojavi va arapskemu portu odmah će bit zaplenjen, a posada finit va pržunu! Mogal je brod promenit i gospodara, i banderu, i ime, ali ako se je jedanput našal na crnoj list tu više ni bilo pomoći. Zavavek bi ostal tamo zapisan. Arabi su tu bili neumoljivi!
Ali to ni značilo da posada ni volela tu liniju. Lipa je to bila ruta; tikala se Italija, Grčka, Cipar, Malta, Turska, istina je da bi bilo dobro da moru tikat Beirut i Aleksandriju, ali ne valja bit sitničav... sve je to bilo vridno toga da ne sme kroz Suez, aš Crveno more ih baš i ni privlačilo.
Bili su to kratki vijaji, petnajstak dan dugi, i nikakove preši ni bilo. Ta put na povratnen putovanju imeli su karag naranač i lemuncini z Haife i Famagusti za Riku, stotinjak ton lešnjaki iz Turske va vrećah za Ravenu, i neč cizibi za Veneciju. I to je bilo to. Sve se to trebalo brzo skrcat, i onda kod i vavek ukrcat pun karag generalnoga tereta.
No ta vijaj bil je drugačji, iznenađujući! Va Ravene niš nisu ukrcali, va Venecije isto tako... bilo je to čudno aš tu se vavek dosta generalnog karga krcalo. Po dolasku doma, agent je bil tajanstven, i samo je barbe rekal kako on kod sebe nema listu tereta za ukrcaj, i da neka barba gre šefu linije ki će mu dat sve informacije.
I tako je barba šal kod šefa linije. Šef ga je lipo primil, i nakon ča su kurtoazno poćakulali, reče: - Nemoj se čudit, ukrcat ćeš spomenik tuniskoga predsjednika Habiba Bourguibe i otpeljat je direktno va Tunis.
- Ravno va Tunis!? - začuđeno će barba, - Valjda znaš da mi ne smemo va Arabiju! Zaplenit će brod, a mene prvoga va pržun pospravit. Ili ti misliš da Tunis ni Arabija?! -
Šef se je samo nasmel i rekal: - Naravno da znan, ali se je sređeno i to z najvišega mesta, znaš ono Tito - Naser sava sava, a to ti je isto Tito- Bourguiba sava sava, i još dodal da je bista poklon naše državi odnosno Titotov poklon Tunisu.
- A ča ćemo još ukrcat? - pital je barba.
- Niš, samo bistu. Visoka je nekih desetak metri, brončana, teška nekoliko ton. Nakon ča je skrcate, proslijedite za Haifu ukrcat naranči i lemuncini za doma, i to je to! - odgovori šef.
Ni bilo druge nego pomirit se z nalogon, obavjestit posadu, pripravit štivu broj dva i čekat da dopelju ta vražji spomenik.
- I ča ćemo sad storit? - pital ga je čif.
- A vrag će ga znat! Tek kad ga ukrcamo moć ćemo videt kako ćemo ga ricat a da se ne ošteti. I onda ćemo svi skupa celo vrime molit Boga da nan da dobro vrime, a onda ćemo još više molit da va Tunisu ne ne finimo va pržunu!
Bista je bila stvarno vela! Bourguiba na konju z rukun na pozdrav. Ni bil problem ukrcat je, ali je bil problem to ča je bila viša od štivi, pa čak i od soljera, tako da je cela Bourguibina glava špijala nad drvenemi bokaporti.
No i to se rešilo. Glavu su omotali z ceradami, a drvene bokaporti postavili sve do same bisti, i onda su sve to skupa potpuntali, dobro ricali i partili.
Još nisu pošteno ni fermali po dolasku va Tunis, a na brod su nahrupili policjoti, carinici i lučke vlasti. Barbu skoro da nisu vezali i otpejali va pržun; da kako se osudil doć ovamo, da će mu sekvestrat brod, pohapsit i njega i posadu... ma čuda. A barba brižan nikako da dojde do besedi.
U međuvremenu je noštromo znel ceradu z glave biste i razmaknul bokaporti tako da se ukazala glava predsjednika Bourguibe, va punen sjaju! Taman tad pod brod su z rotirkami došle dve crne limuzine z kih su zišli agenti i još neki funkcionari. Odmah su se otresli na brižne policjote i rastirali ih. I sad je barba konačno mogal odahnut. Jadni kogo bil je bled ko krpa, toliko da va nesvjest ni pal, a sekondo je od straha skoro gaći napunili.
Bista je bila brzo skrcana, i oni su još istu večer partili. Strah je vrag, a zna se da obično najgore projdu oni ki su najmanje krivi!
Sad ta bista ponosno stoji na jednen prekrasnen trgu va La Goulete, na ulazu va porat Tunisa.
- Neće stat dugo... - komentiral je noštromo: - Nać će se kakov mudrijaš domoljub ki će je zrušit i prodat za sekundarnu sirovinu, pa će doć neki drugi i vrnut je nazada...
- Tako ti to gre moj noštromo... To ti je politika, a mi ko mone još na to plješćemo... prvo njemu na konju, pa onomu ki njega makne, i onda opet onomu ki ga vrne...
...
