Radnički savjet
BN 204Kad brod vozi karag bunkera treba bit točno toliko da se sigurno dojde do porta iskrcaja
Nema toga ča se moren ne more prevest, od ljudi, beštij, žitaric, rudače, se vrste tekućega karga, od nafti do vina, tekućega plina, generalni tereti, razne mašinerije, municija, oružje, tenki, auti, avioni, platformi za naftu, jahti pa čak i manji brodi se moru peljat z velimi brodi... I sve se to more dopeljat i va najzabitneji del svita! Zato su namenjeni razni tipovi brodi, putnički, linijaši, trajekti, bulk karijeri, tankeri, plinari, bananjeri, specijalni za specijalne terete, za teške terete, a danas i kontejneraši i da ne nabrajamo dalje. Jednostavno rečeno ima ih sakakoveh! Svi ti silni brodi nekad su navigali na jedra, pa na karbun, a danas na naftu. A da bi brod mogal vozit na naftu, nju prvo toga treba ukrcat na brod, odnosno bunkerat, ili storit bunker, kako to pomorci va celen svitu zovu.
Bunker ni jednostavna operacija! Veli brodi puno troše, dugo su na moru i treba in puno bunkera. Jednostavna računica veli da je brod storen da vozi karag, i ča ga more peljat više to je bolji, ali koliko će moć ukrcat, ovisi o puno toga. Jedna od tih stvari je i bunker.
Kad brod vozi karag bunkera treba bit točno toliko da se sigurno dojde do porta iskrcaja. Tanki balasta moraju bit prazni i mrtve težine mora bit čim manje. Kako je i bunker del mrtve težine, njega ne smi bit previše, ali ga ne smi ni falet. Ne daj bog da ga nestane!
Emil je bil kapo na linijašu ki je uglavnon tikal isti porti. Peljali su generalni karag, količina ča se tereta tiče ni bila važna, pa su svaki put krcali ful bunker va onemu portu kade je cijena bila najniža.
Na Emilu je bilo da zračuna koliko ga more zet, a armator je odlučival kade i koliko će ga zet. Najčešće je to bila Amerika, ali nekad se znalo dogodit da bunkeraju i va Genovi.
Upravo je Genova Emilu bila najdraža. Tamo mu je bunker peljala mala petroljerica, vavek ista. Već je dobro poznali i posadu i kapitana ki je rodon bil Lošinjan. Zapravo ne on, nego njegovi mat i otac. Volel je Emil i Genovu i malu petroljericu aš tu mu je sve vavik lipo i dobro hodilo, sve je besprijekorno funkcioniralo.
Svaki put kad bi krcali Emil i kapitan su užali popit kafe i bićerin domaćega maraskina, malo poćakulat. Bunker je vavik bil napravljen kako treba, i svi su bili zadovoljni, a kapitan petroljerice naročito, aš je po običaju svaki put dobil bocu viskija i karton cigareti.
Tako je i jednoga puta na povratku z Amerike va Đenovu, drugi dan večer, petroljerica pomalo koštala uz brod. Noštromo je zazval Emila: - Kapo! Ča je ovo?! Krcamo bunker, a niki od nas niš ne zna! Trebali ste nan reć da se pripravimo... -
- Ma kakov bunker?! Tr znate da smo ga storili va Merike! - odgovoril je Emil ki je jušto večeru finil i odbavljal se poć va grad. Sad mu ni bilo druge nego poć videt ča se to događa...
Petroljerica se ni pošteno ni vezala uz bok, a kapitan je već bil na njihovomu brodu i došal ravno Emilu va kabinu.
- Ostalo mi je dvanajst ton dizela koga ne smen vratit va rafineriju, jer san prošal financu, a brod komu je bil namenjen ni mogal se zet, dat ću vam ga badava, samo da ga se rešin! -
Čin je to čul Emilu su zasvitele oči. Na kraj kraji bil je on pravi kapo, a kapo je ko i svaki kapo lakom na bunker. Odmah je va glavi zračunal da će mu z dvanajst ton dizela generatori vrtet osan dan. Istoga časa je kod oparen ztekal z kabine i prema barbi. Ni barbi ni bilo krivo ča će in generatori vrtet besplatno, ali on je za razliku od kapa bil malo oprezniji pa je rekal: - Sve je to lipo, moj kapo, ali ča ako ki to bude špijal i tužil nas va kunpaniju? Ča ako Talijanon bude sumnjivo?-
- Ma daj barba... Šest i pol je, štivadori su finili rabotu, škuro je, nikoga ni va portu, a mi siguro nećemo dignut banderu ni zapalit crveno svitlo na jarbolu. Sve će bit gotovo za pol uri! - nagovaral ga je Emil, i na kraju ja je i nagovoril. Barba je dal kapitanu dve boci viskija i pet šteki cigareti, za sakoga od posade po jednu.
- I vidi ti sad problema, moj Emile... Sad ja moran zmišljat štorije da bin opravdal ove dve boci i cigareti... Tako nan i treba kad nan je gospodar radnički savjet. Grego bi nas nagradil, i to altroke! -
- Lahko za radnički savjet! Oni to neće doznat. Garantiran! Znan ja moju ekipu. Ali večeras nan je propal izlazak, a mislel san na Venti Sentembre poć pogledat ona dobar film, kako se ono zove, sa Sofijun Loren i Albertom Sordijem... a mogal si i ti poć smanun! - rekal je Emil.
- Nema veze poć ćemo jutra večer. Ionako ostajemo do prekjutra, a morda i dalje. Agent je rekal da se spravlja štrajk. Italija je to... - odgovoril mu je barba.
Petroljerica se nečujno odvezala i pomalo, ko tat zgubila va šušuru i sumaglice porta. Sve je dobro finilo, a moglo je bit i drugačje. Nažalost, ni Emilu ni barbi niki ni rekal ni fala, a kamo da bi in dal kakovu pohvalu ili ča drugo. Da stvar bude bolja, još su misec dan strahovali da će ki videt da imaju višak goriva pa da će i filadu dobit!
Tako je to kad ti je armator radnički savjet...
...
