1. RAZNO

Meštar

Svako jutro bi se digal oko sedan, marendal, zel sondu i ključ za sondi otpret, i onda bi najprvo sondiral santine po štivami

Svaki brod, bil to ratni, putnički, teretni, petroljera, plinar, specijalni, remorker, ribarica ili jahta, je složeno prevozno sredstvo. Ča je veći to je složeneji, a saki je drugačji i ča bi Ive rekal razlikuju se kod i čovik od čovika, u stvari kod žena od ženi! Englezi su imeli pravo kad su ga va ženski rod spravili!

Brod treba imet posadu, od kapitana do maloga od kužine, i niki ni višak, a ča je najvažneje, svaki od njih treba znat oddelat posal za ki je inbarkan.

Ive je po struke bil marangun. Zanat je zučil va škveru, i kad je vojsku finil storil je matrikulu i ukrcal se na brod duge plovidbe, za meštra. Meštar je va rangu noštroma kuverti, noštroma makine, mehaničara, električara, glavnoga kuhara i glavnoga kamarijera. Nadređen mu je prvi ofičjal, ali za posal je samostalan, sam. Marangunu nikad ni falilo posla. Na brodu je bilo puno drvenine, od vrata, pregrada, plafoni, namještaja, bokaporti, paraskozuli, tikovine na puntu i boat deku i još puno toga. Zadužen je i za sondiranje tankova balasta, tankova pitke i vode za pranje, santina po štivama, i ča je najvažneje za ukrcaj vode. To je Ivu bil najdraži posal.