1. Pomorska anegdota

Gastarbajterka

Barbu Viktora je od pune penzije delilo samo par meseci. To mu je bil zadnji vijaj, i na njemu je proslavil i svoj pedest i peti rođendan.

Trejset i pet let na dugoj plovidbe, sve na jednoj kumpanije, uz dva meseca benificiranoga staža za leto navigacije nabralo je preko četrdeset let staža. Puno, i previše za bit na moru. Bil je Viktor dobroga zdravlja, pomalo mladenačkog izgleda, a ča je najvažneje i pamet ga je još dobro služila. Već je dosta vrimena govoril kako se pripravlja za penziju, da ju komać čeka, i da mu brod neće ni malo falet. Ali malo ki je veroval va to ča je on povedal. Naime, tako su i drugi povedali da bi se nakon samo mesec dan ča su bili va penzije ukrcali na stranca i navigali još bar sedan-osan let, neki i deset!

I tako je došal taj dan i barba Viktor se skrcal. Dobil je od kumpanije uru, a i penzija je bila pristojna, i stvarno je bil vesel ča je navigaciji došal kraj. Malo pomalo navikal se je na kuću i familiju. Baš je užival! Imel je prekrasnu kuću na lipen mestu tako da je z balkona videl celi Kvarner, ko da je na puntu pravoga veloga broda, ki mu je sve do pred neki dan dom bil. Oko kuće je bil veli vrt i on mu je postal zanimacija. Volel je Viktor svoj vrt. Još ko dite je pomagal matere kopat, okopivat i zalevat, rado je gledal kako napreduje salata, radić i druga verdura. Zaradi vrta ni previše mislel ni kad su ga z kumpanije zvali da se opet ukrca, da nekoga kolegu zameni na mesec-dva, z ugovorom od pet-šet meseci za jako dobru plaću. Viktor se je samo pristojno zafalil i odbil govoreć: - Rekal san da gren va penziju da uživan i to je to. Ono ča san prišparal, skupa z penzijun ku dobijen, to je za me i moju ženu dosta, i previše. Kćer je finila školi i zaposlila se, vredna je i pametna i niš joj ne fali, a i koliko vidin, nikomu od mojih ni krivo ča se ja po kuće motan. -

Nakon kratkoga vremena Viktor se je potpuno privikal na dom. Brod više ni ni spominjal. Užival je va svojmu vrtu, a znal bi i poć vanka, nać se s prijateljin, popit kafe, poćakulat. Tek z vrimena na vrime na spanju bi mu se brod znal zavuć va san ki bi se pretvoril va moru. Sanjal je da je va fortunalu i da se je nasukal. Onda bi se zbudil, vas mokar od znoja, i trebalo bi mu dosta vremena da počne verovat kako je sve to bil samo san.

Viktor je bil zadovoljan, ali gospa Vida, Viktorova žena, stvari je videla malo drugačije... Ona je videla Viktora va vrtu i njegovi kolege ki su na stranceh služili dobri soldi. Videla je njihove ženi i kćeri obučene po zadnjoj mode, kako voze novi auti... Sako malo bi, ko slučajno, spomenula kako su neki od koleg penzioneri kupili novu novcatu najmoderneju kuhinju, kauč, novu makinu za pijati prat, pa kino televiziju i pitaj boga ča se ne. Viktor je to čul, ali ni komentiral. Znal bi odgovorit kako je i njihova kuhinja itekako dobra i da njin nova ne rabi, ali da ako baš će, da moru i oni kupit novu. Tr toliko fala bogu imaju!

- Ja Viktore, ma moramo mislet i na starost! Treba šparat. Tako bimo sve ono ča smo prišparali jako brzo potrošili. -

Treba reć da je gospa Vida bila prava, dobra žena, skromna, dobra domaćica. Nikad ni delala i posvetila se kćeri, kuće i mužu. Ko i svaka žena pomorca držala je sva četiri kantuna od kući, ali soldi su soldi, i sad joj se teško bilo pomirit da su nadohvat ruki, a opet dugo. Ni prošlo dugo i Vida je opet počela navrezat kako je žena od Marijana opet promenila koltrini va kamare i dnevnen boravku, ko tobože da Viktora informira, a zaprav nadajuć se da će se predomislet i opet ukrcat. I tako nakon, nekoga vremena i još jedne štorije o tomu ča je ki kupil, Viktor će mrtvo-hladno:

- Ala Vido da se ti i ja neč dogovorimo. Do pred malo ja san bil stalno ća po svitu, a ti stalno doma, pa daj da se promenimo, da ja ostanen doma a da ti greš va svit.

- A kamo ću ja!? Nisan ja kapitan da se moren inbarkat! - odgovori Vida.

- Ma si domaćica, i to prava! Pa zač onda ti ne biš šla va Taliju za domaćicu va kakovu dobru familiju? Kako čujen i oni dobro plaćaju. Ja ću ostat doma i kuću čuvat. Skuhat znan, postelju znan storit, a i posisat prašinu... Pa ča ne govore kako muški i ženske trebaju bit isti? -

To je bilo zadnji put da su se va njihovoj kući čule štorije o imbarkamentu, naviganju i velemin soldin.